गोव्यात शिवसेना मनोहर पर्रिकरांच्या मुलाला तिकीट देणार? संजय राऊतांचं सूचक वक्तव्य

हायलाइट्स:

  • उत्पल पर्रिकर यांच्या वडिलांनी भाजपला गोव्यात एक स्थान निर्माण करुन दिले आहे
  • जर पर्रिकर यांच्या कुटुंबाने हिंदुत्ववादी म्हणून शिवेसेनेबरोबर संबंध जोडण्याचा प्रयत्न केला तर शिवसेना नक्कीच त्यांच्यासाठी ताकद पणाला लावेल

मुंबई: गोव्यातील आगामी विधानसभा निवडणुकीत मनोहर पर्रिकर यांचे पूत्र उत्पल पर्रिकर शिवसेनेच्या तिकीटावर निवडणुकीच्या रिंगणात उतरण्याची शक्यता निर्माण झाली आहे. शिवसेना खासदार संजय राऊत यांनी सोमवारी प्रसारमाध्यमांशी बोलताना याबाबत सूचक वक्तव्य केले. गोव्याचे माजी मुख्यमंत्री दिवंगत मनोहर पर्रिकर यांच्या मुलाला आत्तापर्यंत भाजपने तिकीट दिले नाही, मग शिवसेना त्यांना तिकीट देणार का? असा सवाल संजय राऊत यांना विचारण्यात आला. त्यावर राऊत यांनी म्हटले की, उत्पल पर्रिकर यांनी हिंमत दाखवायला हवी. जर पर्रिकर यांच्या कुटुंबाने हिंदुत्ववादी म्हणून शिवेसेनेबरोबर संबंध जोडण्याचा प्रयत्न केला तर शिवसेना नक्कीच त्यांच्यासाठी ताकद पणाला लावेल, असे संजय राऊत यांनी स्पष्ट केले. ते सोमवारी पणजीत प्रसारमाध्यमांशी बोलत होते. त्यामुळे आगामी निवडणुकीत उत्पल पर्रिकर शिवसेनेचा भगवा हातात घेणार का, याकडे सगळ्यांच्या नजरा लागल्या आहेत.

उत्पल पर्रिकर यांच्या वडिलांनी भाजपला गोव्यात एक स्थान निर्माण करुन दिले आहे. गोव्यात भाजप रुजवली आहे. त्यांच्याच प्रतिमेवर गोव्यात भाजप टिकला आहे. त्यामुळे उत्पल पर्रिकर यांच्यावर अवलंबून आहे. शेवटी राजकारणात धाडसाने काही निर्णय घ्यावे लागतात असेही राऊत यांनी म्हटले.

संजय राऊतांचा गोव्याच्या मुख्यमंत्र्यांना टोला

गोव्यात शिवसेनेचं स्थानच नाही. संजय राऊत नेमकं कशासाठी गोव्यात येतात, हेच कळत नाही अशी खोचक टीका करणारे गोव्याचे मुख्यमंत्री प्रमोद सावंत यांना संजय राऊत यांनी प्रत्युत्तर दिले. गोव्याचे मुख्यमंत्री प्रमोद सावंत हे सध्या जमिनीपासून चार हात वर चालत आहेत. भाजपला मुख्य पर्याय म्हणून भविष्यात गोव्याचे लोक शिवसेनेचा विचार करतील असा विश्वासही राऊत यांनी व्यक्त केला. त्यांना माझ्या शुभेच्छा आहेत. कधी काळी गोव्यातही भाजपला कोणी विचारत नव्हते. त्यामुळे येणाऱ्या काळात गोव्यात भाजप राहते की शिवसेना राहते, हे कळेल असेही राऊत म्हणाले.

‘निवडणूक आयोगाने पंतप्रधान आणि भाजपच्या अध्यक्षांना निर्बंध पाळायला सांगावे’

पश्चिम बंगालमध्ये लाखोंच्या सभा पंतप्रधान, गृहमंत्री आणि भाजपा अध्यक्षांनी घेतल्या. तिसऱ्या लाटेचा जोर दुसऱ्या लाटेपेक्षा जास्त आहे. महाराष्ट्रात आकडे भयावह आहेत तर उत्तर प्रदेशात रुग्णांची नोंदच होत नाही. त्यामुळे पुढच्या महिनाभरात उत्तर प्रदेशात काय होईल हे सांगता येत नाही. निवडणुक आयोगाने आरोग्य विभागाबरोबर चर्चा केल्याचे म्हटले आहे. पण हा काही उपाय नाही. निवडणुका वेळेत जाहीर केल्या आहेत पण लोकांचे प्राण महत्त्वाचे आहेत. अनेकदा निवडणुका काही काळासाठी पुढे ढकलल्या जातात. पण कोणाला तरी घाई झाली आहे पटकन निवडणुका घेण्याची. पंजाब, उत्तर प्रदेश, मणीपूर आणि उत्तराखंडमध्ये परिस्थिती चांगली नाही. निवडणूक आयोगाने निर्बंध घातले आहेत. हे कागदावरती ठीक आहेत. देशाचे पंतप्रधान आणि भाजपा अध्यक्षांना कुठलेही नियम नसतात आणि तेच इतरांसाठी असतात. त्यामुळे निवडणुकांच्या आचारसंहितेच्या बाबतही समान नागरी कायदा असायला हवा, असा टोला संजय राऊत यांनी लगावला.

Leave a Reply

Your email address will not be published. Required fields are marked *