बुल्लीबाई अ‍ॅप प्रकरणाला धक्कादायक वळण; नेपाळमधील ‘ती’ व्यक्ती कोण?

हायलाइट्स:

  • बुल्लीबाई अ‍ॅप प्रकरणाला धक्कादायक वळण
  • इंटरनॅशनल लिंक असण्याची दाट शक्यता.
  • श्वेता सिंहच्या चौकशीतून महत्त्वाचे धागेदोरे.

नवी दिल्ली: बुल्लीबाई अ‍ॅप प्रकरणी मुख्य आरोपी नीरज बिष्णोई याच्यासह श्वेता सिंह, विशालकुमार, मयंक रावल या चार आरोपींना बेड्या ठोकण्यात आल्या आहेत. यात नीरज याला दिल्ली पोलिसांनी तर अन्य तीन आरोपींना मुंबई पोलिसांनी अटक केली असून यामागे इंटरनॅशनल लिंक असण्याची दाट शक्यता असल्याने पोलिसांपुढे तपासाचे आव्हान अजून कायम आहे.

बुल्लीबाई अ‍ॅपच्या माध्यमातून सोशल मीडियात सक्रिय असलेल्या १०० मुस्लिम महिलांना टार्गेट करण्यात आले. त्यांचे आक्षेपार्ह फोटो या अ‍ॅपवर परस्पर पोस्ट करून त्यावर प्राइसटॅग लावले गेले व बोली लावली गेली. हा धक्कादायक प्रकार समोर आल्यानंतर एकच खळबळ उडाली. याप्रकरणी एका पीडित महिला पत्रकाराच्या तक्रारीवरून दिल्लीत गुन्हा दाखल झाला तर त्याचवेळी मुंबई पोलिसांनीही या अ‍ॅप प्रकरणी अज्ञात व्यक्तीविरुद्ध गुन्हा दाखल केला. त्यानंतर तपास सुरू झाला आणि आतापर्यंत याप्रकरणात चार जणांना अटक केली गेली आहे. सर्वप्रथम मुंबई पोलिसांनी बेंगळुरू येथे कारवाई करत विशालकुमार याला अटक केली. विशालकुमार हा सिव्हिल इंजिनीअरिंग करतोय, असे त्याच्या तपासातून स्पष्ट झाले. त्याच्याकडून मिळालेल्या माहितीच्या आधारे त्याची सोशल मीडियावरील फ्रेण्ड श्वेता सिंह हिला उत्तराखंडमधील उधमसिंहनगर येथून अटक करण्यात आली. ती बारावी उत्तीर्ण असून सध्या पुढचं शिक्षण घेतेय. त्यानंतर मुंबई पोलिसांनी उत्तराखंडमधूनच मयंक रावल या आणखी एका आरोपीला अटक केली. तोसुद्धा विद्यार्थी आहे. त्याचवेळी दिल्ली पोलिसांनी मोठं यश मिळवत मुख्य आरोपीच्या मुसक्या आवळल्या.

बुल्लीबाई अ‍ॅप डेव्हलप करणारा नीरज बिष्णोई दिल्ली पोलिसांच्या हाती लागला. त्याला आसाममधील जोरहाट येथून अटक करण्यात आली. तो वेल्लोर येथील इंस्टिट्युट ऑफ टेक्नॉलॉजी येथे शिकत होता. बी. टेक कंप्युटरच्या दुसऱ्या वर्षात तो होता. त्याला इंस्टिट्युटमधून निलंबित करण्यात आले आहे व तो आता कट्टरतावादी बनला आहे, अशी माहिती पोलिसांच्या तपासातून समोर आली आहे.

आंतरराष्ट्रीय अँगलचा तपास

बुल्लीबाई अ‍ॅपच्या माध्यमातून धार्मिक तेढ निर्माण करण्याचे कारस्थान असण्याची आणि यामागे इंटरनॅशनल लिंक असण्याची शक्यता आहे. त्यादिशेने पोलीस तपास करत आहेत. उत्तराखंडमधून अटक करण्यात आलेली श्वेता सिंह ही नेपाळमधील एका व्यक्तीच्या संपर्कात होती, अशी माहिती मिळाली असून त्याआधारावर तपास केला जात आहे. आतापर्यंत पोलिसांनी सहा राज्यांमध्ये याप्रकरणी तपास केला असून तंत्रज्ञांची मदत घेतानाच सोशल मीडियात या अ‍ॅपबाबत असलेली माहितीही तपासली जात आहे.

Leave a Reply

Your email address will not be published. Required fields are marked *